Festival di Buki di Mucha 2023
‘Juffrouw, juffrouw por regala mi e buki ey,
mi no tin e ainda!'
Of mane mi ta yam'e popularmente: Siman di buki 2023.
Mi a participa na hopi Siman di buki, mi a disfruta inmensamente di cada un. Mi buki, mi cas ta un experiencia unico den tur sentido. Ainda e cantica ta resona den mi cabes.
Laga mi cuminsa pa confesa cu prome mi a pensa, ‘Mi n’ sa con mi ta bay haci esaki UN SIMAN 19 klas.’ Conociendo mi mes mi a premira si cu manera e bateria di SDB cuminsa, mi bateria di energia, entusiasmo y gana di comparti cu e muchanan tambe lo start. Y dicho hecho.
Asina mi yega cas mi ta manda mensahe den app di famia conta y gaba y manda potret, si mi haya nan di e guianan, pa Zahira, mi yiu mayo, post mesora pa mi riba mi pagina di FB di autor y personal. Mi n’ sa si ta cansa el a cansa, en todo caso el a conseha mi pa skirbi un blog y traha un post pa comparti potret y mi experiencia. ‘Y ta con largo e blog aki por ta?’, mi a puntra mesora. Laga mi purba primi tur cos den mita A-4. Indra a bisa; ‘Mami, mami ta haci diferencia den bida di e muchanan y por sigui haci esaki.’
E sala di Cas di Cultura practicamente yen, tabata un señal di e exito di SDB e aña aki. E apertura caba, strak den pak, bon structura, cu mucha, di mucha y pa mucha. Nada di bruhamento di cantidad di hende ta subi baha stage. Speech di minsternan y presentacion di Fundacion Bon Nochi Drumi cu bunita mensahe riba pantaya. Tur cortico y conciso. Un MC cu chispa y cara sonriente cu a sa di tene cuenta cu e grupo meta. Muchanan entusiasma cu a presenta manera ta riba scenario na Broadway nan ta. Durante evaluacion a sobresali cu esaki tabata experiencia di tur participante. Sinta dilanti bo por a gosa di dos presentacion, esun den centro riba stage mes, y esun na banda di e muchanan cu a baha stage caba. Tur cu e mes energia.
Guianan atento manera custumber cu ta busca bo na cas, pa bo por yega e scolnan relaha sin presion di trafico. Prome cu mi drenta e scolnan ya mi termometer interno di placer di lesamento tabata indica cu e scol a prepara e muchanan. Cada klas tabata un experiencia diferente, mayoria a crea e ambiente di e tema di SDB, Mi buki, mi cas, na un manera visibel. Tin cu a haci uzo di nan digibord, otro a traha buki den forma di cas, tin cu a uza tema di comikita conoci pa e muchanan y cada klas a haci algo diferente relaciona cu e comikita. Na e scol aki mi mester a pensa bon cua parti di e serie di Bencho pa lesa of trata pa no divulga mucho pa juffrouw por a sigui conta despues. Un scol for di entrada caba bo ta haya bo den un dushi ambiente di lesamento, cu stul comodo, buki etc, cu nan mester a kita tur atardi arma bek su mañan mainta. Na e scol aki cada klas a haya e tarea di traha diferente forma di cas y vivienda di diferente pais y cultura. E bunita di esaki ta cu a traha conhuntamente cu mayor, na un forma holistico y integrativo. Para na e trapi di entrada caba un scol completo a ricibi mi cu e cantica di SDB 2023 ta resona y ami cu gusta balia a drenta scol ta swing cu e muchanan. Na e scol aki porta di cada klas drecha manera entrada di un cas.
Na un otro scol e juffrouw di klas a prepara e muchanan asina bon cu buki di trabou y tur. Un juffrouw a bisa mi na final; ‘Juffrouw e storia aki ta manera mi propio storia.’ E atencion bunita di cada scol ora di dispidi, mayoria obra traha na man door di e muchanan den pensamento di e tema, un cariñito, un pintura,un storia. Durante siman poco poco mi stoel di sala a yena di regalito.
Loke mas a impreciona mi ta e atencion y participacion di tanto e muchanan den klas como e maestronan. Muchanan cu ta colga na mi lip ora mi conta, lesa y dialoga cu nan. Nan sinceridad ora mi puntra ken gusta lesa. Hopi dede ta bay laira. Esunnan cu no ta gusta lesa tin nan motibo; mi n’ ta compronde, mi mester lesa lihe, e bukinan ta laf, mi n’ tin buki etc.’ Si mi husga e entusiasmo durante e presentacionnan y con nan ta participa activamente y ta puntra na unda nan por haya mi bukinan y si mi ta bin bek, mi ta haya ratificacion, cu stimulacion tin efecto.
Mi a bishita klas 5 y 6 na e diferente scolnan. Cu e serie di Bencho y Bons Slip mi por a toca temanan manera Tratatado di Derecho di mucha, igualdad, discriminacion, bullying, Ley di traficacion di hende, guera, conmemoracion recien di Nochi di Cristal, tur esaki como reaccion di e muchanan di loke a conta of lesa pa nan. Naturalmente na nivel cu e nan por a compronde.
Kere ora mi bisa cu mi termometer no ta gaña mi. Un mucha den un otro klas ta conta cu e gusta lesa, e gusta buki di guera, mescos cu mi, no pa e agresion pero pa loke ta e storia di e ser humano. El a lesa Diario di Anne Frank, dos mucha den e mes klas cu ta presta otro buki ora nan caba di les’e. Manera mi a drenta un klas, e mucha sinta patras a capta mi atencion. E tabatin tin e curashi di hisa dede y bisa cu e ta gusta lesa y skirbi y cu e tin hopi storia skirbi.E tin un cashi cu 80 buki, 30 cu el a skirbi y 50 di otro hende. Yam’e dilanti pa comparti y berbad e tin un multomap cu hopi, sin exagera, hopi storia, el a pone mi corda mi mes tempo mi ta mucha. E por a conta di e temanan riba cua e ta skirbi, con e ta compila informacion etc. Un mucha na un otro scol cu cu entusiasmo ta murmura den mi horea ora mi ta sali di klas; ‘Juffrouw, juffrouw por regala mi e buki ey, mi no tin e ainda. Despues mi a busca e ultimo ehemplar di Bencho ta rebeldia na Plaza Bookstore hiba scol p’e.
Mi mester bisa si, cu loke mi termometer a indica mi tambe ta cua maestronan mes ta gusta lesa of ta pone mas atencion na lesamento, no solamente lesa pa cifra, tambe pa placer. Mayoria tur mucha tabata consciente di e importancia di lesa.
Pa loke ta e bijbel sagrado di Avi-nivel, por ta ta tempo pa nos puntra nos mes como educador si e presion aki ta berdaderamente na fabor di e mucha. Si ami mester lesa algo na un idioma cu mi no ta comprende, mi lo frustra tambe. Ta husto mara un mucha na un nivel cu e mag di lesa, sin compronde pa gran parti kico e ta lesa? Berdad cu e mester por lesa tecnicamente como instrumento, pero ta con e ta bay realisa e tema Mi buki, mi cas?